USHIRIKIANO RASILIMALI ZA UTAFITI NI SULUHISHO CHANGAMOTO ZA KISAYANSI

Dar es Salaam, Desemba 4, 2024.

Akizungumza katika Kongamano la Tisa la Wanasayansi, Watafiti, na Wabunifu, Dkt. Julius Keyyu kutoka Taasisi ya Utafiti wa Wanyamapori Tanzania (TAWIRI) ametoa wito kwa taasisi za utafiti kushirikiana raslimali za kisayansi badala ya kila moja kujiendesha kivyake.

Dkt. Keyyu ameeleza changamoto kubwa inayokabili sekta ya utafiti: “Tuna tatizo katika kushirikiana raslimali za utafiti. Tunahitaji kuchukua hatua ya pili kutoka kushirikiana data za utafiti hadi kushirikiana raslimali za utafiti.”

Amebainisha kuwa mara nyingi taasisi nyingi huwekeza katika kununua vifaa vya gharama kubwa ambavyo vinatumika mara chache tu kwa mwaka. “Kuna haja ya taasisi zinazomiliki vifaa vya kisasa vya utafiti kutoa nafasi kwa watu wa taasisi nyingine kutumia, kuliko kila taasisi kununua vyake wakati wengine vinatumika mara moja tu kwa mwaka,” alisema.

Dkt. Keyyu amependekeza kuanzishwa kwa mfumo wa kitaifa au kikanda wa kushirikiana vifaa vya kisasa vya utafiti, ambapo watafiti kutoka taasisi tofauti wanaweza kupata ufikiaji wa vifaa wanavyohitaji kwa kazi zao. Ushirikiano huu utaimarisha ufanisi, kupunguza gharama, na kuharakisha maendeleo ya kisayansi.

Katika wasilisho hilo, washiriki walikubaliana kuwa ushirikiano wa raslimali za utafiti ni muhimu kwa kuhakikisha matumizi bora ya rasilimali chache zilizopo, hasa katika nchi zinazoendelea. Walihimiza serikali kuweka sera zinazohamasisha ushirikiano wa aina hiyo na kuwekeza katika miundombinu ya kidijitali ambayo itarahisisha upatikanaji wa vifaa vya utafiti.

Kwa kumalizia, Dkt. Keyyu amesema, “Kwa kushirikiana raslimali za utafiti, tunaweza kuimarisha ubora wa tafiti zetu, kupunguza gharama, na kufanikisha matokeo yenye tija kwa maendeleo ya jamii.” Wito wake umepokewa kwa mtazamo chanya na matarajio makubwa ya utekelezaji wa mapendekezo hayo.